ព្រះវិហារជីវិតថ្មីភ្នំពេញប្រារព្ឋបុណ្យណូអែល
ដោយប៉ិច សង្វាវ៉ាន
ក្នុងពេលដែលប្រទេសជាច្រើននៅក្នុងពិភពលោកបានប្រារព្ឋបុណ្យណូអែលយ៉ាងអធិក
អធម៌ នៅប្រទេសបារាំងឯណោះ បងប្អូនខ្មែរជាច្រើន ទាំងអ្នកកាន់និងអ្នកមិនកាន់គ្រីស្ទ
សាសនាក៏បាននាំគ្នារៀបចំបុណ្យណូអែលក្នុងគ្រួសារយ៉ាងសប្បាយរីករាយណាស់ដែរ។
នៅឯប្រទេសកម្ពុជាឯណេះវិញ ក្នុងឆ្នាំនេះ ដើម្បីអបអរសាទរបុណ្យណូអែល គេសង្កេតឃើញ
នៅតាមហាង និង ភោជនីយដ្ឋាននានាក៏ដូចជានៅតាមសណ្ឋាគារធំៗដែរ មានការតុបតែង
ដើមសាប៉ាំង(sapin)យ៉ាងល្អៗរំលេចទៅដោយខ្សែរំយោល(Guirlande)ពណ៌ផ្សេងៗភ្លឺផ្លេក
លំអដោយអំពូលកែវស្រួយ (Boules en verre)ជាច្រើនពណ៌ និងខ្សែភ្លើងចម្រុះពណ៌ចាំង
រស្មីភ្លឺភ្លឹបភ្លែតៗគួរឲ្យចង់គយគន់ពន់ពេកក្រៃមិនខុសពីអារ្យប្រទេសនានាដែលកាន់គ្រីស្ទ
សាសនាឡើយ។
«ព្រះវិហារជីវិតថ្មីភ្នំពេញ(១)» ដែលជាព្រះវិហារខ្មែរដ៏ធំមួយក្នុងរាជធានីភ្នំពេញបានប្រារព្ឋ
ពិធីបុណ្យណូអែលឆ្នាំ២០១០យ៉ាងឱឡារិកនៅថ្ងៃ២៥ធ្នូនិងថ្ងៃ២៦ធ្នូ។
កម្មវិធីពិសេសនៅថ្ងៃនោះមានជាអាទិ៍៖ ការអធិស្ឋានសុំព្រះពរ ការសូត្រខរគម្ពីរ
ទីបន្ទាល់ ការសម្តែងព្រះបន្ទូលដោយលោកគ្រូគង្វាលតាំង វ៉េកហួង
ចម្រៀងកាយវិការសម្តែងដោយក្រុមកុមារាកុមារីមណ្ឌលជីវិតថ្មី ចម្រៀងកាយវិការ
សម្តែងដោយក្រុមយុវជនយុវនារី ក្រុមបញ្ញវន្ត និងក្រុមបុរសស្ត្រី ចម្រៀងពិសេស
ចម្រៀងសរសើរដំកើងព្រះ
ចម្រៀងពិសេស សម្តែងដោយក្រុមស្ត្រី និង បុរស (រូបថត ប៉ិច សង្វាវ៉ាន)
ព្រមទាំងមានការបញ្ចាំងភាពយន្តនិយាយភាសាខ្មែរស្តីពី«ជីវប្រវត្តិព្រះយេស៊ូគ្រីស្ទ»។
គ្រប់ឆាកទាំងអស់ត្រូវបានរៀបចំឡើងយ៉ាងល្អប្រណិតទៅតាមអត្ថន័យចម្រៀងនិមួយៗ
និងស្ថិតក្រោមការតុបតែងកាយដោយសម្លៀកបំពាក់ប្រពៃណីខ្មែរនិងសម្លៀកបំពាក់
សម័យទំនើបយ៉ាងថ្លៃថ្នូរគួរឲ្យសរសើរ និងគួរឲ្យមានមោទនៈភាព។
ពីធីករពីររូបដែលមានសំនៀងនិងវោហាពីរោះបានចេញមកបង្ហាញឆាកនិមួយៗឥតទាស់
ត្រចៀកឡើយ។ ទាំងអស់នេះគឺពិតជាទេពកោសល្លដែលព្រះបានប្រទានឲ្យពួកគេ។
លោក គ្រូ តាំង វេក ហួង សម្តែង ព្រះ បន្ទូល (រូបថត៖ ប៉ិច សង្វាវ៉ាន)
- ចម្រៀងកាយវិការដោយក្រុមកុមារាកុមារី (រូបថត៖ប៉ិច សង្វាវ៉ាន)
ចម្រៀងសរសើរដំកើងព្រះដោយ ក្រុមយុវជនយុវនារី (រូបថត៖ ប៉ិច សង្វាវ៉ាន)
ចម្រៀងពិសេសដោយក្រុមស្ត្រីនិងបុរស (រូបថត៖ប៉ិច សង្វាវ៉ាន)
ពិធីបុណ្យណូអែលដ៏ឧឡារឹកនេះបានបញ្ចប់ទៅដោយមានការជប់លៀងភោជនាហារពេលល្ងាច
ដែលអមកំដរដោយការប្រគុំតន្ត្រីរបស់ព្រះវិហារ និងមានច្រៀងចម្រៀងជាពួកដែរ។
ដើម្បីបង្កលក្ខណៈឲ្យកាន់តែរីករាយនៅក្នុងរាត្រីដ៏ត្រកាលនោះ ព្រះវិហារបានបន្ថែម
ឲ្យមានការចាប់ឆ្នោតយករង្វាន់ទៀតផង។
លើសពីនេះ អ្វីដែលគួរឲ្យកត់សំគាល់នោះ ក្នុងកម្មវិធីពេលព្រឹកក៏ដូចជាពេលយប់ដែរ
ឯ.ឧ.អ៊ុង ទី ដែលជាសមាជិកព្រឹទ្ឋសភាសមាជិកអចិន្ត្រៃយ៍ក្រុមប្រឹក្សាអន្តរសាសនាកម្ពុជា
និងប្រធានក្រុមប្រឹក្សាគ្រីស្ទបរិស័ទគណៈនិកាយប្រូតេសស្តង់កម្ពុជា
(Senator & President – member ofCambodia Inter-religion Council
In Charge of Cambodia Christian ProtestantCommunity /W.C.R.P
បានថ្លែងអំពីចំណាប់អារម្មណ៍ដ៏មានខ្លឹមសារដែលផ្តោតលើ
មាត្រា៤៣នៃជំពូកទី៣អំពីសិទិ្ឋនិងករណីយកិច្ចរបស់ប្រជាពលរដ្ឋដែលមានចែង
ក្នុងច្បាប់រដ្ឋធម្មនុញ្ញថា«ប្រជាពលរដ្ឋតាំងពីរប្រភេទមានសិទ្ឋិពេញទីខាងជំនឿនិង
ការប្រតិបត្តិខាងផ្លូវសាសនាត្រូវបានរដ្ឋធានាក្នុងល័ក្ខខ័ណ្ឌដែលមិនប៉ះពាល់ដល់
ជំនឿឬសាសនាដទៃ ទៀតដល់សណ្តាប់ធ្នាម់និងសន្តិសុខសាធារណៈ។
លើសពីនេះ ឯកឧត្តមអ៊ុង ទីក៏បានបញ្ជាក់ដែរអំពីការរំជូលចិត្តក្រោយពីបានស្តាប់ទី
បន្ទាល់របស់ខ្ញុំស្តីពីព្រះគុណអស្ចារ្យរបស់ព្រះជាម្ចាស់ក្រោយពីមានឧបសគ្គជាង១ឆ្នាំក្នុង
ការសុំចូលនិវត្តន៍មុនគម្រប់អាយុ៦៥ឆ្នាំ ប៉ុន្តែនៅទីបំផុត ព្រះអង្គបានប្រទានពរដ៏បរិបូណ៍
ឆ្លើយតបនឹងសេចក្តីអធិស្ឋានរបស់ខ្ញុំ(សូមអានព្រឹត្តការណ៍ជីវិត១ជ្រុង)ដោយបាន
ដោះស្រាយ
បញ្ហានេះនិងបញ្ហាធំៗជាច្រើនដែលកើតមានក្នុងរយៈពេល៦ឆ្នាំចុងក្រោយនេះ។
ឯឧ អ៊ុង ទី ថ្លែងចំណាប់អារម្មណ៍ (រូបថត ៖ប៉ិច សង្វាវ៉ាន)
ពីឆ្វេងទៅស្តាំ៖ ខ្ញុំនិងស្វាមីខ្ញុំឯឧ ប៉ិច ឈុន - ឯឧ អ៊ុងទី - លោកគ្រូគង្វាល តាំង វេក ហួង និង អ្នកគ្រូជាភរិយានៃព្រះវិហារជីវិតថ្មីភ្នំពេញ (រូបថត៖ ប៉ិច សង្វាវ៉ាន)
ក្នុងកម្មវិធីពេលរាត្រីក៏ដូចជាកម្មវិធីពេលព្រឹកដែរ ពិធីករដែលសម្បូណ៍សំនួនវោហា
ប្រចាំព្រះវិហារជីវិតថ្មីភ្នំពេញបានធ្វើអត្ថាធិប្បាយយ៉ាងពីរោះក្បោះក្បាយបង្កបរិយាកាស
ឲ្យកាន់តែមានសភាពរស់រវើកដែលញ៉ាំងឲ្យអ្នកចូលរួមចំនួនប្រហែលជា
១ពាន់ឬជាងមួយពាន់នាក់បានសោមនស្សរីករាយត្រជាក់ចិត្តត្រជាក់អារម្មណ៍
និងមានអំណរក្រៃលែង។
គ្រីស្ទសាសនិកជនទាំងឡាយមិនអាចបំភ្លេចបានឡើយនូវបរិយាកាសដ៏ពិសេស
ដែលមានលក្ខណៈជាគ្រួសារតែមួយនៅក្នុងឱកាសបុណ្យណូអែល…
បុណ្យណូអែលដែលជាបុណ្យខួបកំណើតនៃព្រះយេស៊ូគ្រីស្ត
(១):ព្រះវិហារជីវិតថ្មីភ្នំពេញ
អាគារលេខ៤ ផ្លូវ៩៥ ក្រុមទី១០ សង្កាត់បឹងកេងកង ២
ខ័ណ្ឌចំការមន រាជធានីភ្នំពេញ
ទូរស័ព្ទលេខ : ០២៣ ២១០ ៣៥៤
ទូរស័ព្ទទំនាក់ទំនង :០១២ ៨០០ ៧៦៦ – ០១២ ៣៣១៩៨១
មតិយោបល់ថ្មីៗ