Category Archives: កិច្ច​ការ​របស់​ខ្ញុំ​នៅ​វិទ្យុ​បារាំង Rfi-khmer

ក្រោមមេឃពណ៌ខៀវនៅទីក្រុងតូក្យូ និពន្ធដោយប៉ែន​ សេដ្ឋារិន រៀបចំផ្សាយក្នុងវិទ្យុបារាំងអន្តរជាតិRFI ដោយប៉ិច​ សង្វាវ៉ាន

 អស់លោកអ្នកស្តាប់ជាទីមេត្រី ថ្ងៃនេះ ខ្ញុំសូមអញ្ជើញលោកអ្នកនាងស្តាប់នាទីអក្សរសិល្ប៍ខ្មែរដែល

ខ្ញុំប៉ិច សង្វាវ៉ានមានសេចក្តីរីករាយរៀបចំជូនដូចតទៅ៖

Advertisements

«ជិវិត​កូន​ថ្លៃ ​កូន​ត្រូវ​តែ​រស់​»ផ្សាយ​នៅ​ RFI khmer

01-0

វិទ្យុ​បារាំងអន្តរជាតិ ​RFI សម្រេច​ចាក់​ផ្សាយ​ បទ​យកការណ៍​របស់​ខ្ញុំពី​សៀវភៅ​«ជីវិត​កូន​ថ្លៃ កូន​ត្រូវ​តែរស់​» សរសេរ​ដោយ លោក ពិនយ៉ា ថៃ ចំនួន​ពីរ​ដង​នៅក្នុង​នាទី​ព័ត៌មាន​ ម៉ោង១៣ និង​ម៉ោង១៩ សម្រាប់​ថ្ងៃទី​២៩ មីនា ២០១៦។

ខ្ញុំ​រំភើបនឹងបានស្តាប់សំឡេងខ្លួនឯងឡើងវិញដែរ។ តាំងពីចូលនិវត្តន៍ (រឺត្រែត) កាលណា RFI ស្ទើរតែ​មិនដែរចាក់ផ្សាយកិច្ចការរបស់ខ្ញុំ​ទេ។ នៅស្រុកបារាំង អ្នកដែលនិយមសំឡេងនិងកិច្ចការក្នុងវិទ្យុរបស់ខ្ញុំ​ គេក៏​ទាមទារចង់ស្តាប់ណាស់​ដែរ​។

01-PSW

ខ្ញុំ​ស្តាយត្រង់បំណងមួយ គឺចង់បញ្ចេញអ្នកនិពន្ធជាច្រើនដែលបានផ្សាយក្នុងវិទ្យុ ឱ្យគេបានស្គាល់ផង ព្រោះពួកយុវអ្នកនិពន្ធទាំងនោះជាទំពាំងស្នងឬស្សី។

 

02-

«ជិវិត​កូន​ថ្លៃ ​កូន​ត្រូវ​តែ​រស់​» ជា​ប្រសាសន៍​ចុង​ក្រោយ​របស់​ឪពុក​ម្នាក់​ ដែល​បាន​ថ្លែង​ទៅ​កាន់​កូន​ប្រុស​មុន​នឹង​ស្លាប់​​។ ​កូន​ប្រុស​ដែល​កំពុង​ត្រដរ​រស់​យ៉ាងវេទនា​បំផុត​ក្នុង​របប​បដិវត្តន៍​ខ្មែរ ​ក្រហម​ ។

បើ​គ្មាន​បណ្តាំ​នេះ​របស់​ឪពុក​ទេ ​ប្រហែល​ជា​លោក​វិស្វករ​ ពិន​ យ៉ាថៃ ​មិន​អាច​ប្រឹង​រស់​ និង​ខំ​គេច​ឲ្យ​ផុត​ពី​​ក្រញ៉ាំ​ពេជ្ឃ​ឃាដ​ខ្មែរ​ក្រហម​បាន​ឡើយ​ ហើយ​ម្យ៉ាង​ទៀត​ លោក​ក៏មិនបាន​សរសេរ​សៀវភៅ​ទុក​ជា​សក្ខីភាព​លាត​​ត្រដាង​អំពី​របប​ខ្មែរ​ក្រហម ​ផ្តាច់​ការ​ និង​មិន​បាន​ដើរ​ក្នុង​បស្ចិម​ប្រទេស​ជា​ច្រើន​ដើម្បី​អធិប្បាយ​​ ផ្សព្វ​ផ្សាយ​​ជា​សាធារណៈ ឲ្យ​សកលលោកជ្រួតជ្រាប​​ដឹង ការពិត​ អំពី​មហា​វិនាសកម្ម​នៅ​ប្រទេស​កម្ពុជា​ ជា​ពិសេស ​អំពី​ស្ថានការណ៍​អាសន្ន​នៃ​ប្រជាពលរដ្ឋ​ខ្មែរ​យើង​ក្នុង​របប​ប្រជាធិបតេយ្យ ​ឡើយ

សូម​ស្តាប់​សំឡេង​នៅទីនេះ៖ http://www.mediafire.com/download/yavv3694n3m3tp2/13h00-22-TU_VIVRAS_MON_FILS_PIN_YATHAY_29-03-2016.mp3

 

សៀវភៅ «ជីវិត​កូន​ថ្លៃ កូន​ត្រូវតែ​រស់» បកប្រែ​ជា​ភាសា​បារាំង

សៀវភៅ «ជីវិត​កូន​ថ្លៃ កូន​ត្រូវតែ​រស់» បកប្រែ​ជា​ភាសា​អង់គ្លេស

សៀវភៅ «ជីវិត​កូន​ថ្លៃ កូន​ត្រូវតែ​រស់» បកប្រែ​ជា​ភាសា​ចិន

8-

និងជា​ ភាសា​រុស្សី ?

9-

សូម​ទស្សនា​វីដេអូ រៀប​ចំ​ដោយ ហេង ឧត្តម នៅ​ខាង​ក្រោម​នេះ

សហគ្រិន​ចំណាន ឬ​គ្រប់​មាគ៌ា​សុទ្ឋ​តែ​ក្រាល​មាស

140927លោក​គឹម វូឈុង​ជា​ប្រធាន​ស្ថាបនិក​នៃ​បណ្តុំ​សហគ្រាស ឌេវ៊ូ DAEWOO។ លោកបាន​និពន្ឋសៀវភៅនេះ​ឡើង​ក្នុង​គោល​បំណង​ចែក​រំលែក​បទ​ពិសោធន៍​របស់​លោក​ ដល់​យុវជន​កូរ៉េ និង​យុវជនទាំងឡាយនៅ​ក្នុង​ពិភពលោក​ទាំង​មូល។

«សហគ្រិន​ចំណាន ឬ ​គ្រប់​មាគ៌ា​សុទ្ឋ​តែ​ក្រាល​មាស»ជាសៀវភៅមួួយដ៏មានខ្លឹមសារដែល ​បង្ហាញ​អំពី​គំនិតត្រិះរិះ​ពិចារណា ការវិភាគព្រឹត្តិការណ៍​បច្ចុប្បន្នមួយចំនួន​ដែល​មាន​ជាអាទិ៍ ​ឧក្រិដ្ឋកម្ម អត្ថប្រយោជន៍​នៃ​ការសិក្សា ​ការងារ និង​មុខនាទី​របស់​ស្រី្ត​នៅក្នុង​សង្គមជាតិ។ល។ ម៉្យាងទៀត សៀវភៅ​នេះ​ក៏​បង្ហាញ​ផង​ដែរ​អំពី​របៀបរៀបចំ​និងការ​គ្រប់គ្រងមួយដែលមាន​លក្ខណៈ ថ្មី​សុទ្ធសាធដែលមាន​ប្រសិទ្ឋភាព។

ដោយ ប៉ិច សង្វាវ៉ាន

អត្ថបទចុះផ្សាយនៅ វិទ្យុ​បារាំង​អន្តរជាតិ​ កាលពីថ្ងៃទី១៧ មករា ២០១០

លោក គឹម វូឈុន ប្រធាន​ស្ថាបនិក​សហគ្រាស​កូរ៉េ ឌេវូ (រូបថត៖ប៉ិច សង្វាវ៉ាន)

លោក គឹម វូឈុន ប្រធាន​ស្ថាបនិក​សហគ្រាស​កូរ៉េ ឌេវូ
(រូបថត៖ប៉ិច សង្វាវ៉ាន)

សូម​ចុះ​ស្តាប់ទីនេះ ៖ http://mfi.re/listen/jzobhhabee4zjp7/PSW-KRUP_MEAKEA_SOTH_TE_KRAL_MEAS_Traduit_par_KIM_KHAUNY.mp3

ប្រាកដ​ណាស់​ថា សៀវភៅ​នេះ​សម្រាប់​យុវជន​កូរ៉េមុនគេ ប៉ុន្តែ​លោក​គឹម វូឈុង​យល់​ថា  ទោះជានៅ​ក្នុង​ប្រទេសនិមួយៗមានកំពស់​វឌ្ឍនធម៌​ខុសប្លែក​គ្នា​ក្តីក៏​យុវជន​តែងតែត្រូវការ​ដំបូន្មាន​និង​អ្នក​ជួយ​ណែនាំត្រួសត្រាយបង្ហាញផ្លូវ​ដែរ។ ពួកគេ​ត្រូវការ​ភាពស្វាហាប់ និង​ថាមពល​ដើម្បី​ប្រឈម​មុខ​តទល់​នឹង​ស្ថានភាព​សម្ងាត់នៃ​ការស្វែង​រក​ជើង​មេឃ​ថ្មី។ យុវជនក៏​ត្រូវការបន្ថែម​នូវ​សេចក្តី​សង្ឃឹម និង​គោលដៅ​សម្រាប់​អនាគត។ សំខាន់​ជាង​នេះ​ យុវជន​មាន​បំណង​​ពង្រីក​ទស្សនៈ​ដ៏​មាន​​ប្រយោជន៍​ ក្នុង​ករណី​ទទួល​ខុស​ត្រូវ​ដើម្បី​ធ្វើ​ឱ្យ​មាន​អនាគត និងធ្វើ​ឲ្យ​ពិភពលោក​ល្អ​ប្រសើរ។ គ្មាន​អ្វី​ដែល​ធ្វើ​ពុំ​បាន​នោះ​ទេ បើគេមានការ​ទុក​ចិត្ត ការតាំង​ចិត្តមុតមាំ និងការ​ជឿជាក់។ កាលណា​អ្នក​មាន​ការទុក​ចិត្ត និង​មាន​គំនិត​ប្រាកដ​និយម​នោះ គ្មាន​​ឧបសគ្គ​អ្វីរារាំង​ឡើយ។ មាន​ឱកាស​ច្រើន​ណាស់​ដែល​សំងំ​រង់ចាំឱ្យ​អ្នកស្វែង​រក។ យ៉ាងណាមិញ ជីវិត​បើក​ទា្វរឱ្យ៖

ជន​ណា​ដែល​មាន​គំនិត​ប្រាកដ​និយម

– ជន​ណា​ដែល​មាន​ការ​ទុក​ចិត្ត និង​ជំនឿ

– ជន​ណា​ដែល​ចេះ​ជំនះ​ឆាក​ជីវិត​យ៉ាង​ស្វាហាប់។

លោក ​គឹម វូឈុង​មាន​ដើម​កំណើត​ក្រីក្រ​គ្មាន​ទ្រព្យ​ធនមែន ប៉ុន្តែ លោក​មាន​ការស្រមៃ មាន​គំនិតត្រិះរិះពិចារណា​ ​និងការតាំងចិត្តដ៏​​មោះមុត​និងមានជំនឿ​ជឿជាក់ គួបផ្សំជាមួយ​គំនិត​សុទិដ្ឋនិយមទើបលោក​​ក្លាយ​ទៅ​ជា​សហគ្រិន​ចំណាន​មួយ​រូបនៅក្នុង​ប្រទេស​កូរ៉េ​ខាងត្បូង។ សៀវភៅ​របស់​លោក​​គឹម វូឈុង​ជា​មេរៀន​ជីវិត​ដ៏​ល្អ​ពិតៗ​ដែល​លោក​គឹម ខូវនី អតីត​សាស្ត្រាចារ្យ​នៃ​មហាវិទ្យាល័យ​ពាណិជ្ជសាស្ត្រ នៅ​ទីក្រុង​ភ្នំពេញ​​​ប្រែសម្រួល​ជា​ភាសា​ខ្មែរ បន្ទាប់​ពី​សៀវ​ភៅដ៏មានខ្លឹមសារ​នេះ​បានបក​ប្រែ​ជា​ច្រើនភាសារួចទៅហើយនៅក្នុងពិភពលោក៕

(​កែសម្រួលនៅថ្ងៃ១៩ មករា ២០១៥)។

កំណាព្យស្នេហ៍មាស និពន្ធ​ដោយ​ លោក ​គង្គ ប៊ុនឈឿន – Rfi

ខ្ញុំ​សូម​យក​កិច្ច​ការ​របស់​ខ្ញុំកាលពី​ពេល​ដែល​ខ្ញុំ​បំពេញ​ការងារ​នៅវិទ្យុ​បារាំង​អន្តរជាតិ Rfi មក​ចុះ​ផ្សាយ ដើម្បីជាការ​សន្សំ​ស្នាដៃ​របស់​ខ្ញុំ​ឡើង​វិញ និង​ជាការ​ផ្សាយ​ដល់​អ្នក​ស្តាប់អ្នក​អានទាំង​ឡាយ​ ដែល​ខក​ខាន​មិន​បាន​ស្តាប់​វេលា​ផ្សាយ​កាល​មុន។ ការ​ផ្សាយ​ឡើងវិញ​​គ្រានេះ​ ខ្ញុំ​គ្មាន​ចេតនា​ផ្សេង​ក្រៅពី​ចង់​លើក​ស្ទូយ​សិល្បៈ​វប្បធម៌​អក្សរ​សាស្ត្រ​អក្សរ​​សិល្ប៍​ជាតិ​ខ្មែរ​យើង​នោះទេ។

kbc book

 កំណាព្យស្នេហ៍មាស និពន្ធ​ដោយ​លោក​គង្គ ប៊ុនឈឿន

 នៅ​ឆ្នាំ​២០០០ លោក ​គង្គ​​  ប៊ុន​ឈឿន ដែល​ជា​អ្នក​និពន្ធ​ដ៏​ល្បី​ល្បាញមួយរូប​ បាន​ចេញ​​ផ្សាយ​សៀវភៅ​មួយ​​ដាក់​ចំណង​ជើង​ថា​​ កំណាព្យ​ស្នេហ៍​មាស។ កំណាព្យ​ស្នេហ៍​មាស ជា​កំណត់ហេតុ​ស្នាដៃ​ ឬជា​កម្រង​វណ្ណកម្មទាំង​អស់​របស់លោកគង្គ​​  ប៊ុន​ឈឿន តាំង​ពី​លោក​បាន​ចាប់​ដង​ប៉ាកកា​ប្រឡូក​ក្នុងជីវិត​ទឹក​ខ្មៅ​ ពី​ទស្សវត្សរ៍​១៩៥០​មក ដូច​ជា​ ប្រលោមលោក​ កំណាព្យ​ ​បទ​ភ្លេង ​​​ទំនុក​ច្រៀង​ ​និងរឿង​ភាពយន្ត​វីដេអូ​ជា​ដើម​ ។

ប្រវត្តិ​បទចម្រៀង​អ្នកនិពន្ធ​ជើងចាស់ គង្គ ប៊ុនឈឿន

សូមចុចខាងក្រោម ដើម្បី​ស្តាប់ (ភាគទី១) http://mfi.re/listen/cytawh2mt2no5ko/KONGBUNCHHOEUN_07_11_04.mp3

ដោយ ប៉ិច សង្វាវ៉ាន

អត្ថបទចុះផ្សាយកាលនៅវិទ្យុ​បារាំង​អន្តរជាតិ Rfi ពីថ្ងៃទី 13/09/2009

 

បំណង​របស់​លោក​ គង្គ​​ ប៊ុន​ឈឿន ក្នុង​ការសរ​សេរ​សៀវភៅ​នេះ​ មាន​៣​​ចំណុច​គឺ​៖

 ទី១-​ លោកចង់រក្សា​ទុកផ្នត់គំនិត​របស់លោក​ ដែល​ជា​ផលចំណែក​នៃ​ការ​ត្រិះរិះ​ពិចារណា​មួយ។

ទី២-    លោកចង់ឲ្យ​អ្នក​អាន​ដឹង​ពិត​ប្រាកដ​ថា ពេលដែល​លោក​រស់​នៅ​ លោក​បាន​ធ្វើអ្វី​ខ្លះ?

ទី​៣-    លោកចង់​បញ្ជាក់​ប្រាប់​មជ្ឈដ្ឋានមួយចំនួន​ដែល​បាន​យកស្នាដៃ​របស់​លោក​ទៅ​ ប្រើ​ប្រាស់​ជា​​​ផ្លូវ​ជំនួញ​ ដោយ​មិន​គោរពសិទ្ធិ​របស់លោក​ជាអ្នក​និពន្ធ​​​ដើមបន្តិច​បន្តួច​សោះ។

តាំង​ឆ្នាំ១៩៦៣ រហូត​មកដល់​ខែ​មេសា​ឆ្នាំ​១៩៧៥ លោក គង្គ ​​ ប៊ុន​ឈឿន ​និពន្ឋទំនុក​ច្រៀង​ និង​​​បទ​ភ្លេង​ បាន​ជាង​ពីររយ​បទ​​។​

ដោយ ​ចេះ​ភ្លេង​ខ្លះៗ​ និង​ចេះ​កាន់​ឧបករណ៍តន្រី្ត ដូច​ជា​ ​វីយូឡុង​​ និង​ហ្គីតាច្បាស់​លាស់​ លោក​គង្គ ប៊ុន​ឈឿន​ តែង​តែ​បង្ហូរ​មនោសញ្ចេតនា​តាម​មន្ត​ស្នេហ៍​នៃ​តន្តី្រ​ និង​តាមរសជាតិ​កំណាព្យ​ទំនុក​ច្រៀង​ លុះ​ត្រា​តែ​ក្លាយ​ទៅ​ជា​ទម្លាប់​។

តាំង​ពី​នៅ​ក្មេង លោក ​គង្គ ប៊ុន​ឈឿន ពេញចិត្ត​អ្នកចម្រៀង​ ស៊ីន ​ស៊ីសាមុត​ និង​អ្នក​និពន្ឋ​ អ្នកបទភ្លេង​ទំនុក​ច្រៀង​ ពៅ ​ស៊ី​ផូ ណាស់។ អ្វីៗ​ដែល​លោក គង្គ ប៊ុន​ឈឿន បានឮក្នង​សម័យ​ ជា​រសជាតិ​ស្រោចស្រប់​បេះដូង​លោក​ឲ្យ​ដុះពន្លក​មនោសញ្ចតនា​កំណាព្យ​ ទំនុក​ច្រៀង​កាន់តែ​ខ្លាំងឡើងៗ​គ្មាន​ស្រកស្រុត​។​

គេចំណាំ​ឃើញ​ថា​ ចម្រៀង​របស់លោក​ គង្គ ប៊ុន​ឈឿន ច្រើនតែ​រៀបរាប់ពី​ខេត្ត​បាត់ដំបង​​ ដែល​ជា​ទឹកដី​កំណើត​របស់​លោក និង​ ឆ្លុះ​បញ្ចាំង​ពី​សេចក្តី​ស្នេហា​របស់​លោក​ក្នុង​យុវវ័យ​ ជា​អាទិ៍​បទ​ស្ពាន​ឈើ​អភ័ព្វ​ ។ ស្ពាន​ឈើ​អភ័ព្វដែល​សព្វ​ថ្ងៃ​នេះ​ គេ​នាំ​គ្នា​ប្តូរ​ដាក់​ថា​ភូមិ​វត្ត​កំផែង​ ខុស​ពី​ចំណង​ជើង​ដើមគួរ​ឲ្យ​ស្តាយ។ ​លោក ​គង្គ ប៊ុន​ឈឿន បញ្ជាក់​ពីមូល​ហេតុ​ដែល​បាន​ជំរុញ​ឲ្យ​លោក​និពន្ធ​បទ​ ស្ពាន​ឈើ​អភ័ព្វ ​និង​ ជំនួប​ចុង​ក្រោយ​របស់​លោក​ជា​មួយ​លោក​ ស៊ីន​ ស៊ី​សាមុត៕

KBC.

 ប្រវត្តិ​បទភ្លេង និងទំនុកច្រៀង

កំណាព្យ​ស្នេហ៍មាស និពន្ធ​ដោយ​លោក គង្គ ប៊ុនឈឿន

 សូមចុចខាងក្រោម ដើម្បី​ស្តាប់ (ភាគទី២) http://mfi.re/listen/oewaj623edpzo9j/KONG_BUN_CHHOEURN01_23-08-09.mp3

ដោយ ប៉ិច សង្វាវ៉ាន

អត្ថបទចុះផ្សាយកាលនៅវិទ្យុ​បារាំង​អន្តរជាតិ Rfi ពីថ្ងៃទី 30/08/2009

 កំណាព្យ​ ស្នេហ៍​មាស ​ជាកម្រង​ បទ​ភ្លេង​ទំនុក​ច្រៀង​​ដែល​ចេញ​មក​ពីកំណាព្យ។​ កំណាព្យ ដែលលោក​ គង្គ ​ប៊ុនឈឿន បាន​និពន្ធ មាន​អត្ថន័យ​ទោរទន់​ទៅ​រក​រឿងបេះដូង ច្រើន​ជាង​រឿង​ដទៃ​ទៀត។

 អ្នក​ដែល​មាន​រឿង​បេះដូង​ ពេល​ណា​យំ​ក៏​ច្រៀង សប្បាយ​ក៏​ច្រៀង​ ខឹងសម្បារ​មួរ​ម៉ៅ​ក្រេវ​ក្រោធ​ក៏​ច្រៀង​ដែរ។​ ដូច្នេះ ​ចំពោះ​លោក​ គង្គ ​ប៊ុនឈឿន ​ចម្រៀង ឬ កំណាព្យ​ស្នេហ៍​មាស​​គ្មាន​អ្វី​ឃ្លាត​ឆ្ងាយ​ពី​គ្នា​ឡើយ។

បទ​ភ្លេង និង​ទំនុក​ច្រៀង​របស់​លោក​ គង្គ ​ប៊ុន​ឈឿន​ សុទ្ធ​​តែ​មាន​អាយុ​ច្រើន​ឆ្នាំ​មក​ហើយ។ ប៉ុន្តែ​នៅ​តែ​មាន​ប្រជាប្រីយភាព​រហូត​មក​ដល់​សព្វ​ថ្ងៃ​នេះ ។

​សូម​អញ្ជើញ​លោក​​ លោក​ស្រី​ នាង​កញ្ញា​ស្តាប់​ចម្រៀង​៣​បទ​ របស់​លោក គង្គ​ ប៊ុនឈឿន ដែល​បក​ស្រាយ​ដោយ​លោក​ស៊ីន​ស៊ី​សាមុត និង​អ្នកស្រី​ រស់ សិរីសុទ្ឋា។

 អ្នក​ខ្លះ​បាន​យក​ចម្រៀង​របស់​លោក​ទៅ​ដាក់​ក្នុង​ខ្សែ ភាព​យន្ត​ ឬ​ខ្សែ​វីដេអូ​ ជា​ចម្រៀង​កាយវិការ ការ៉ាអូខេ​ចេញ​លក់​ព្រោង​ព្រាត​ ឥត​គិត​ដល់​លោក​ គង្គ ​ប៊ុនឈឿន ដែល​ជា​​អ្នក​និពន្ធ​​ដើម​បន្តិច​បន្តួច​ឡើយ សូម្បី​តែ​ដែល​ដឹង​ហើយ​ក៏​នៅ​បំពាន​ដែរ។ ជន​ឱកាស​និយម​មួយ​ចំនួន​ទាំង​នោះ ​ប្រឹង​បឹត​ជញ្ជក់​ញើស​ឈាម​អ្នក​និពន្ធ​ និង​សិល្បករ​ដែល​មាន​គំនិត​ច្នៃ​ប្រឌិត​​ដើម្បី​បម្រើ​​ផល​ប្រយោជន៍​វប្បធម៌​ជាតិ​ ឲ្យ​បាក់​ទឹកចិត្ត​ស្ទើរ​តែ​អស់​ឆន្ទៈ​បម្រើ​ការងារ​ដ៏​អភ័ព្វ​នេះ​រលីង។

 នៅ​ក្នុង​ផែនកាណ៍​១០​ឆ្នាំ​របស់​ពិភពលោក​ខាង​វិស័យ​វប្បធម៌ គេបាន​បែង​ចែក​ចំណុច​ វិជ្ជមាន​៤​យ៉ាង​ច្បាស់​លាស់​ថា ៖

 ១- ត្រូវ​ដាក់​វប្បធម៌​ក្នុង​បេះដូង​នៃ​ការ​អភិវឌ្ឍ​

២- ​ពង្រឹង​​ និង​ធ្វើ​ឲ្យ​អត្តសញ្ញាណជាតិ​មាន​ភាពសម្បូណ៌​បែប​

៣- ធ្វើ​ឲ្យ​ការងារ​វប្បធម៌​ ទៅជា​ការងារ​របស់​មនុស្ស​គ្រប់​គ្នា

៤- ជំរុញ​វិស័យ​វប្បធម៌​ ឆ្ពោះ​ទៅ​កាន់​សាមគ្គីភាព​អន្តរជាតិ

 លោក ​គង្គ ​ប៊ុន​ឈឿន សូម​ឲ្យ​សៀវភៅ​នេះ​បាន​ទៅជា​ឯកសារ​សម្រាប់​អ្នក​ស្រាវជ្រាវ​ជំនាន់​ក្រោយ​ ជា​ពិសេស​ជា​មរតក​ដ៏​មាន​តម្លៃ​សម្រាប់​គ្រួសារ​របស់​លោក​ផ្ទាល់។

 តាម​រយៈ​ឯកសារ​វប្បធម៌​ដ៏​ល្អ​នេះ ខ្ញុំ​សូម​ឧទ្ទិស​ និង​​ចែក​រំលែក​នាទី​ ដែល​ខ្ញុំ​​បាន​រៀប​ចំ​ឡើង​ដោយ​ពឹង​ផ្អែក​លើ​សៀវ​ភៅ​កំណាព្យ​ស្នេហ៍​មាស​​របស់ លោក ​គង្គ ​ប៊ុនឈឿន ​នេះ​ជូន​ប្រីយ​មិត្ត​អ្នក​ស្តាប់​វិទ្យុ​បារាំង​អន្តរជាតិ​RFI។

 ខ្ញុំ ​ប៉ិច ​សង្វាវ៉ាន ​សូម​អញ្ជើញ​លោក​​ លោក​ស្រី​ នាង​កញ្ញា​ស្តាប់​ចម្រៀង​៣​បទ​ដែល​បក​ស្រាយ​ដោយ​លោក​ ស៊ីន ​ស៊ី​សាមុត និង​អ្នកស្រី ​រស់ សិរីសុទ្ធា៕